khudi ko aa gai hansi umid ke sawal par
andhere tilmila uthe charagh ki majal par

ye chahaton ka dard hai ye qurbaton ka hashr hai
jo dhup chhup ke roi aaftab ke zawal par

ye jaan kar ki chand mere ghar mein jagmagaega
sitare aaj sham se hi aa gae kamal par

nazar mein zindagi ki phul mo'atabar na ho sake
khizan ko e'tiraaz tha bahaar se visal par

khabar ye der se udi ki maut se mafar nahin
parind jab utar chuke shikariyon ke jal par

zamana jis ki zindagi mein qadr kuchh na kar saka
ab aasman ro raha hai us ke intiqal par

kahan wo 'mina' chahaton ki shiddaton ka silsila
kahan ye be-niyaziyan hamare arz-e-haal par