khush-kaam karo khatir-e-nakaam hamein do
khali ho ki labrez koi jam hamein do

mayus nahin hum abhi islah-e-bashar se
har ku-e-ghalat manzil-e-badnam hamein do

jaulan-gah-e-khasan-e-mohabbat se guzaro
kahte nahin hum shahrah-e-am hamein do

aarasta gesu se ata ho fan-e-sadi
nazron se adab-para-e-khayyam hamein do

maslak hai mohabbat ka wal-itmam minallah
kyon kashmakash-e-khatir-e-nakaam hamein do

gunjaan hua gesuon walon se mohalla
ham-tarz-e-hasinan-e-awadh sham hamein do

'mani' yahi suqraat ka sajjada-nashin hai
dena hai use zahr bhara jam hamein do