kyun baith gae ghubar se hum
kuchh kah na sake bahaar se hum

ye zindagi umr bhar ka rona
ghabra gae intizar se hum

wo jabr ki lazzaton ka aalam
baz aae is ikhtiyar se hum

hanste hain ki hans sake zamana
khush hain to is e'tibar se hum

yun bhi to sukun mila hai barson
phirte rahe be-qarar se hum

wo lamha hai aaj tak gurezan
jab tum se the ham-kanar se hum

ab aakhir-e-shab 'nazar' hai shayad
phir jaise hain hoshiyar se hum