lakh nadan hain magar itni saza bhi na mile
chaarasazon ko meri sham-e-bala bhi na mile

hasrat-agin to hai nakaami-e-manzil lekin
lutf to jab hai ki khud apna pata bhi na mile

kuchh nigahon se gham-e-dil ki khabar milti hai
warna hum wo hain ki baaton se hawa bhi na mile

khwahish-e-dad-rasi kya ho sitam-gar se jahan
aankh mein shaiba-e-uzr-e-jafa bhi na mile

is qadar qaht-e-basirat bhi nahin ai waiz
hum buton ke liye niklen to khuda bhi na mile

ishq wo arsa-e-pur-khar hai hamdam ki jahan
zindagi ras na aae to qaza bhi na mile

kya qayamat hai tabiat ki rawani 'waris'
koi dhundhe to nishan-e-kaf-e-pa bhi na mile