le ke hathon mein mohabbat ke guhar aae hain
ek nazar dekh tere khak-basar aae hain

ek ajab dhadka dil-o-jaan ko laga rahta hai
jab bhi pardes se hum laut ke ghar aae hain

jis taraf bhi main gaya main ne jidhar bhi dekha
zakhm ki tarah mujhe log nazar aae hain

nok-e-neza ki taraf ek nazar dekh zara
kis bulandi pe wo ushshaq ke sar aae hain

mom ho jae wo patthar ki tarah sakht badan
apne nalon mein kahan itne asar aae hain

sar-phiri aandhi girane use aa pahunchi hai
aas ke ped pe jis dam se samar aae hain

jab se utra hai safina mera sahil pe 'nabil'
mauj-dar-mauj kinare pe bhanwar aae hain