main zahr rahi har sham rahi
barish ki hawa badnam rahi

patal mein dariya jazb hue
main sath rahi do-gam rahi

imkan-e-asar par shama-e-dua
bujhne ki ada ka nam rahi

mere tanha dasht ke jazbon mein
teri yaad tah-e-alam rahi

konpal ko dhup hawa se kya
mitti ki nami nakaam rahi

baadal meri chhat par kab thahre
diwar pe gahri sham rahi

is ghar ke andhere lamhon mein
bas ek kiran sar-e-baam rahi

main chhanw ke sukh se laut gai
teri dhup mera aaram rahi