main ne apni maut pe ek nauha likkha hai
tum ko sunata hun dekho kaisa lagta hai

jism ko kar dala hai khwahish ka harkara
chehre par masnui waqar saja rakkha hai

suni kar dali hai basti khwab-nagar ki
kal tak jo dariya bahta tha khushk hua hai

honton se zanjir-e-khamoshi bandh rakhi hai
taq-e-umid pe dil ka charagh bujha rakkha hai

nind se bojhal palkon par andesha-e-mitti
kashti-e-jaan ke dubne ka lamha aaya hai