main ne mana kaam hai nala dil-e-nashad ka
hai taghaful shewa aakhir kis sitam-ijad ka

hae wo dil jo hadaf tha nawak-e-bedad ka
dard sahta hai wahi ab ghaflat-e-sayyaad ka

nargis-e-mastana mein kaifiyat-e-jam-e-sharab
qamat-e-rana pe aalam misra-e-ustad ka

mana-e-fariyaad hai kuchh taba ki afsurdagi
kuchh sukut-amoz hai pas-e-adab sayyaad ka

is qadar dilkash raha tera agar andaz-e-jaur
zakhm-e-dil munh chum lega khanjar-e-bedad ka

majlis-e-matam bani aane se un ke bazm-e-aish
pad gaya phulon mein mere ghul mubarakbaad ka

tu na kar tark-e-sitam zalim sitam ho jaega
jaan se jaega khugar lazzat-e-bedad ka

dard-e-nakaam-e-hujum-e-arzu ka hai maal
talkhi-e-hasrat natija shauq-e-ulfat-zad ka

hasrat-afza hai bahut mere dil-e-viran ka jal
kaun hai farman-rawa is mulk-e-ghair-abaad ka

lutf hi aata raha hai sai-e-baatil mein mujhe
hai yahan afsos kis ko mehnat-e-barbaad ka

khinch kar le chal mujhe shauq-e-asiri su-e-dam
kaam aisa kar ki jis se ji badhe sayyaad ka

kis ko shikwa hijr ka aur kis ko hasrat wasl ki
lutf-parwarda hai mera dil kisi ki yaad ka

ye ada-e-dil-rubayana ye andaz-e-haya
kis tarah phir kaam karti hai nazar jallad ka

'wahshat' us but ne taghaful jab kiya apna shiar
kaam khamoshi se main ne bhi liya fariyaad ka