masruf-e-gham hain kaun-o-makan jagte raho
khwabon se uth raha hai dhuan jagte raho

hain sham ke nasib mein tare na aasman
ruk sa gaya hai qalb-e-jahan jagte raho

dil mein khayal hai na nazar mein sawal hai
baqi nahin hai koi nishan jagte raho

chand aur sitare mand hain suraj bhi zard zard
phiki padi hai kahkashan jagte raho

puja ke phul sukh gae intizar mein
soya hua hai shahr-e-butan jagte raho