mera kitna khayal karte ho
sans lena muhaal karte ho

ho wahan bhi jahan nahin maujud
tum ye kaisa kamal karte ho

ishq mein hijr-o-wasl be-mani
kis liye tum malal karte ho

jaante ho ki hum tumhaare hain
phir bhi dil paemal karte ho

hum ne dekha hai ek zamane ko
zindagi kyun wabaal karte ho

mere ikhlas ka karishma hai
jism-o-jaan ko nihaal karte ho

kaun kya hai ye jaanti hun 'sabin'
us se tum kya sawal karte ho