mere nasib ne jab mujh se intiqam liya
kahan kahan teri yaadon ne hath tham liya

faza ki aankh bhar aai hawa ka rang uda
sukut-e-sham ne chupke se tera nam liya

wo main nahin tha ki ek harf bhi na kah paya
wo bebasi thi ki jis ne tera salam liya

har ek khushi ne tere gham ki aabru rakh li
har ek khushi se tere gham ne intiqam liya

wo marka tha ki fath o shikast bhi na mili
na jaane 'shaz' ne kis maslahat se kaam liya