meri bala se sari duniya ujde ya aabaad rahe
teri khushbu jis mein basi hai wo kamra aabaad rahe

aashiq aur mashuq ka rishta aur ziyaada pukhta ho
tere zulm-o-jaur salamat dil mera aabaad rahe

mere ghar ki diwaron par barbaadi ka qabza hai
teri gali ko jaane wala har rasta aabaad rahe

subh sawere khwab mein dekha mujh se koi ye kahta tha
ek tu hi barbaad rahe aur jag sara aabaad rahe

ilm-o-hunar ka markaz hai aur shahr hai 'jaun'-o-'nasir' ka
jab tak chand sitare chamken amroha aabaad rahe