meri dhadkan ho zindagi ho tum
kis liye mujh se ajnabi ho tum

waqt ki be-shumar ghadiyan hain
aur mere dil mein har ghadi ho tum

jis ko dekha hai khwab mein aksar
mujh ko lagta hai bas wahi ho tum

tum ba-zahir to dur rahti ho
aisa lagta hai pas bhi ho tum

kis liye mujh se ruth jati ho
mere aangan ki chandni ho tum

waqt badla to tum bhi badle ho
par mere dil mein aaj bhi ho tum

mujh ko tadpao ya ki pyar karo
haal dil ka to jaanti ho tum

pahle mujh ko ganwa diya tum ne
ab khayalon mein dhundhti ho tum

ab akela nahin 'khalil' ke sath
yaad teri kabhi kabhi ho tum