meri khwahish ka bistar sulagta raha
hijr mein waqt aksar sulagta raha

phul maqtul ke hath mein dekh kar
dast-e-qatil pe khanjar sulagta raha

mehrban the tamashaiyon ki tarah
mere khwabon ka daftar sulagta raha

tez kirnon ki zad mein tha har ek sher
yun takhayyul ka khawar sulagta raha

mai-kada tha baghair un ke viran sa
yaad mein un ki saghar sulagta raha

dur hoti gai us se 'aini' haya
jism se us ke zewar sulagta raha