na kaho e'tibar hai kis ka
bewafai shiar hai kis ka

ai ajal sham-e-hijr aa pahunchi
ab tujhe intizar hai kis ka

ishq se main khabar nahin ya rab
dagh-e-dil yaadgar hai kis ka

dil jo zalim nahin teri jagir
to ye ujda dayar hai kis ka

mohtasib puchh mai-paraston se
nam aamarz-gar hai kis ka

bazm mein wo nahin uthate aankh
dekhna nagawar hai kis ka

pahne phirta hai matami poshak
aasman sogwar hai kis ka

chain se so raho gale lag kar
shauq be-ikhtiyar hai kis ka

aap sa sab ko wo samajhte hain
mo'tabar inkisar hai kis ka

yar ke bas mein hai ummid-e-visal
yar par ikhtiyar hai kis ka

aap 'bimar' hum hue ruswa
sar-nigun raazdar hai kis ka