pahle sabit karen is wahshi ki taqsiren do
kyun mere panw mein pahnate hain zanjiren do

donon zulfon ka teri aaya jo wahshat mein khayal
pad gain panw mein mere wahin zanjiren do

kahan qasid ne ki laya hun main paigham-e-visal
aaj khilat mujhe pahnao ki jagiren do

dard-e-dil dard hua sina ki sozish bhi gai
sharbat-e-wasl mein tere hain ye tasiren do

ya bahane se bulaen use ya khat hi likhen
'sharm' kya khub ye sujhin hamein tadbiren do