phul jab koi bikharta hai to hans dete hain
dard jab had se guzarta hai to hans dete hain

parda-e-zehn pe mazi ke jharokon se kabhi
ek chehra sa ubharta hai to hans dete hain

subh tak jalna pighalna hai hamari qismat
rang-e-shab yun jo nikharta hai to hans dete hain

aagahi bhulne deti nahin hasti ka maal
tut ke khwab bikharta hai to hans dete hain

zindagi johd-e-musalsal hai hirasan kyun ho
walwala jab koi marta hai to hans dete hain