qabr mein ab kisi ka dhyan nahin
sach hai jab ji nahin jahan nahin

band bulbul hi ki zaban nahin
warna gul to hilate kan nahin

dil ne khud ulfat-e-kamar ki hai
is mein kuchh mera darmiyan nahin

abhi kya kya na hoga harj nasib
hum nahin hain ki imtihan nahin

dair kyun zahidon ne chhod diya
kya buton mein khuda ki shan nahin

shams kaisa chamak ke nikla hai
aaj mera jo mehrban nahin

baat kya hai 'sakhi' jo wo hum se
aise chup hain ki kuchh bayan nahin