qaid rakh kar use aazad kiya hai main ne
waqt kis khel mein barbaad kiya hai main ne

dhundhti hai wo kahin aur thikana apna
wo mohabbat jise ijad kiya hai main ne

ghar se bahar main kisi se nahin milne jata
ek nagar soch mein aabaad kiya hai main ne

ab jo chahun bhi to main shad nahin ho sakta
zindagi kyon tujhe nashad kiya hai main ne

'kaif' fursat nahin itni ki palat kar dekho
wo samajhta hai sabaq yaad kiya hai main ne