qurb ke na wafa ke hote hain
jhagde sare ana ke hote hain

baat niyyat ki sirf hai warna
waqt sare dua ke hote hain

bhul jate hain mat bura kahna
log putle khata ke hote hain

wo ba-zahir jo kuchh nahin lagte
un se rishte bala ke hote hain

wo hamara hai is tarah shayad
jaise bande khuda ke hote hain

bakhsh dena bhi thik hai lekin
kuchh saliqe ata ke hote hain

kuchh ko duniya bikher deti hai
kuchh pareshan sada ke hote hain

wo jo hasti mein dub jate hain
un ke charche bala ke hote hain

us ki fitrat hi aisi hai 'akhtar'
jaise tewar hawa ke hote hain