ras aaya nahin hum ko tera aate rahna
yun tera barson talak wada nibhate rahna

tu ne ye jaana na aadab-e-mohabbat kya hai
har mulaqat pe milne tera aate rahna

raegan ho gaya wo gana tera rag basant
mausam-e-khar mein phulon ko ugate rahna

ek sada teri bhi shamil thi hujum-e-tiflan
har sahar chhajje pe mujh ko bhi bulate rahna

jaanta to nahin kante to mere dil mein chubhe
phul tera meri rahon mein bichhate rahna

hai ye be-qufl qafas par wo parinda na uda
qissa-e-ishq tera us ko sunate rahna

tere jaisa bhi hai ek shakhs zamane bhar mein
kab talak majnun aur ranjhon ko ginate rahna

rakh jab main ne kuredi to kahe chingari
kaam tum jaison ka hai duniya jalate rahna

ru-ba-ru aaine ke roz main aaun kaise
kitna mushkil hai nazar khud se milate rahna