roz dilha-e-mai-kashan tute
ai khuda jam-e-asman tute

dushmani is zamin ki dekho
gumbad-e-qabr-e-dostan tute

wasf-e-abru-e-pur-shikan jo na ho
kya ajab khanjar-e-zaban tute

rang lae agar shikasta-dili
bulbulo shakh-e-ashiyan tute

nikhat-e-gul se bas gaya gulshan
ghuncha kya chatke itr-dan tute

khub phaili hai bu-e-baada-e-ishq
shisha-e-dil kahan kahan tute

le udegi hawa-e-baam hamein
na karenge jo nardban tute

qasd-e-parwaz ka jo bojh pada
bazu-e-murgh-e-na-tawan tute

lucknow chal ke ji lagaun 'munir'
kis liye dil mera yahan tute