sham yun dal ke kinare se guzar jati hai
jaise lakdi koi aare se guzar jati hai

main use yaad ki baisakhiyan la deti hun
shab apahij hai sahaare se guzar jati hai

ishq mein donon jahan apne hi kahlate hain
baat phir mere tumhaare se guzar jati hai

zindagi jitni bhi dushwar hun rahen lekin
aap ke ek ishaare se guzar jati hai

main ne logon se suna hai ki wo pagal ladki
hansti rahti hai khasare se guzar jati hai

main tujhe dekh ke an-dekha bhi kar sakti hun
aankh mudti hai nazare se guzar jati hai