shikwe ki chubhan mujh ko sada achchhi lagi hai
ye fart-e-mohabbat ki ada achchhi lagi hai

khali hai kahan lutf se ab dil ka pighalna
pur-dard zamane ki faza achchhi lagi hai

lamhat-e-mohabbat sabhi yaksan nahin hote
ai jaan-e-wafa teri jafa achchhi lagi hai

mahfil mein shanasa bhi bana baitha hai anjaan
us shakhs ki majbur wafa achchhi lagi hai

niklega usi parde se tapta hua suraj
ye soch ke hi kali ghata achchhi lagi hai

tu band kiye kan jo sunti hai sabhon ki
sach-much ye 'sadaf' teri ada achchhi lagi hai