suna ke ranj-o-alam mujh ko uljhanon mein na dal
thakan ka khauf mere azm ki ragon mein na dal

main is jahan ko kuchh aur dena chahta hun
tu kar-e-waqt ke pur-haul chakkaron mein na dal

malul dekh ke tujh ko main ruk na jaun kahin
khudara! hijr ki shiddat ko aansuon mein na dal

teri bhalai ki khatir mujhe utara gaya
mujhe lapet ke kapdon mein taqchon mein na dal

ye hijraten to muqaddar hain aur mashghala bhi
tu be-ghari ke hawale se waswason mein na dal