tang-o-mahdud bahut husn-e-nazar tha pahle
zulf-o-rukhsar pe mauquf hunar tha pahle

aane-jaane ka sarokar kahan se aaya
koi jada na musafir na safar tha pahle

ab bhi gardish mein meri dhup raha karti hai
yahi saya jo udhar hai ye idhar tha pahle

dar-o-diwar se aazad bayaban phir ho
apne shorida-saron ka yahi ghar tha pahle

meri talwar pe hai razm purani likkhi
mere khamosh lahu mein bhi bhanwar tha pahle

ye tasawwur bhi pala aab-o-hawa mein meri
is zamin par na khada aisa shajar tha pahle