tapta hua kisi ke koi aabla na ho
ya-rab hamari tarah koi dil-jala na ho

teri gali ko chhod ke jae wo phir kahan
tere siwa jise koi aur aasra na ho

aao na aaj mil ke karen kulfaton ko dur
ye kaun jaanta hai ki kal kya ho kya na ho

jo chaho kar guzaro tumhein rokta hai kaun
ye sach kaha kisi ne ki banda khuda na ho

ta-hashr dard-e-dil se rahun lazzat-ashna
ya-rab wo dard bakhsh jo mujh se juda na ho

mar jae sar na phod kar apna to kya kare
wo gham-nasib jis ko koi aasra na ho

wo saiqa-badosh chale aa rahe hain aaj
manzar ye dil-ruba kahin sabr-azma na ho

angdaiyan kisi ki wo phir yaad aa gain
phir shorish-e-junun mein koi mubtala na ho

phir be-naqab aaj hai wo shahid-e-jamal
ghash kha ke koi tur pe dekho gira na ho

chingariyan si udti hain pahlu se kyon 'zaki'
qalb-o-jigar ko dekho kahin aabla na ho