tir par tir lage to bhi na paikan nikle
yarab is ghar mein jo aawe na wo mehman nikle

nek-o-bad mein jo nahin jang adam mein to bhala
kyun gul o khar baham dast-o-gareban nikle

dast-e-chaalak junun sina ko bhi kar de chaak
ta kahin pahlu se mere dil-e-nalan nikle

kaun si raat wo howe ki jo aawe shab-e-wasl
kaun sa roz wo ho jo shab-e-hijran nikle

gulshan-e-dil mein bhi thi apni kuchh ulti tasir
tukhm-e-ummid jo boe gul-e-hirman nikle

kar nazar rukh ko tere kufr se nikle kafir
zulf ko dekh teri din se musalman nikle

jitna kahte hain nikalta hai 'hasan' ghar se tere
ghusse ho ho yahi kahta hai abhi han nikle