tod di us ne wo zanjir hi dildari ki
aur tashhir karo apni giraftari ki

hum to sahra hue jate the ki us ne aa kar
shahr aabaad kiya nahr-e-saba jari ki

hum bhi kya shai hain tabiat mili sayyara-shikar
aur taqdir mili aahu-e-tatari ki

itna sada hai mera maya-e-khubi ki mujhe
kabhi aadat na rahi aaina-bardari ki

mere gum-gashta ghazalon ka pata puchhta hai
fikr rakhta hai masiha meri bimari ki

us ke lahje mein koi chiz to shamil thi ki aaj
dil pe is harf-e-inayat ne giran-bari ki