uruj-e-dard-e-tamanna hai ab to aa jao
hamara dil yahi kahta hai ab to aa jao

nahin hai sehn-e-gulistan mein koi hangama
hujum-e-shauq-e-tamanna hai ab to aa jao

khile hain phul kai aarzu ke gulshan mein
bas intizar tumhaara hai ab to aa jao

kabhi kabhi to hasin chandni bhi chubhti hai
kiran kiran mein andhera hai ab to aa jao

na jaane umr kahan ye tamam ho jae
abhi hayat ka lamha hai ab to aa jao

hum apne dil ke andheron se khud pareshan the
charagh-e-shauq jalaya hai ab to aa jao

na sath degi tumhaara bhi 'taj' tanhai
hamare sath ye duniya hai ab to aa jao