us aankh se wahshat ki tasir utha laya
main jagte rahne ki tadbir utha laya

main niyat-e-shab-khun se kheme mein gaya lekin
dushman ke sirhane se shamshir utha laya

wo subh-e-rihai thi ya sham-e-asiri thi
jab main dar-e-zindan se zanjir utha laya

aawara-mizaji par harf aane se pahle hi
dil tere taghaful ki taswir utha laya

ai khwab-e-pazirai tu kyun meri aankhon mein
andesha-e-duniya ki tabir utha laya

wo sang-e-malamat tha jis ko tera dil kah kar
us kuche se mujh jaisa rah-gir utha laya

us shakhs se main sab ko ujlat mein mila baitha
aur apne liye kaisi takhir utha laya

maidan-e-shikayat se kya apne siwa lata
ek ranj tha main jis ki tamir utha laya

us bazm-e-sukhan mein hum kya pahunche ki shor uttha
lo 'azm' koi zakhmi tahrir utha laya