wo to gaya ye dida-e-khun-bar dekhiye
daman pe rang-e-pairahan-e-yar dekhiye

dikhla ke wo to le bhi gaya shokhi-e-khiram
ab tak hain raqs mein dar o diwar dekhiye

ukta ke hum ne todi thi zanjir-e-nam-o-nang
ab tak faza mein hai wahi jhankar dekhiye

sine mein chhup gaya hai tulu-e-sahar ke sath
ab shakh-e-dil pe wo gul-e-rukhsar dekhiye

barq-e-tapida baad-e-saba shola aur hum
hain kaise kaise us ke giraftar dekhiye

pahle bhi tez-rau the par us dil-nashin ke sath
ye chashm-e-nam ye masti-e-raftar dekhiye

'majruh' ke labon se ye khushbu na ja saki
bakhshi jo us ne daulat-e-bedar dekhiye