wo zulm-o-sitam dhae aur mujh se wafa mange
jaise koi gul kar ke dipak se ziya mange

jina badi neamat hai jine ka chalan sikhen
achchha to nahin koi marne ki dua mange

gham bhi hai udasi bhi tanhai bhi aansu bhi
sab kuchh to mayassar hai dil mange to kya mange

aain-e-watan par to dil war chuke apna
namus-e-watan hum se ab rang-e-hina mange

auqat hai kya us ki wo pesh-e-nazar rakkhe
insan na koi apne daman se siwa mange

ramta hua jogi hun bahta hua pani hun
hargiz na koi mujh se ab mera pata mange

phir chehra-e-qatil ki nazron ko zarurat hai
phir kucha-e-qatil ki dil aab-o-hawa mange

wo sair-e-gulistan ko 'firdaus' jo aa jae
muskan kali chahe raftar-e-saba mange