yaadon ka ajib silsila hai
soya hua dard jag utha hai

mit bhi chuke naqsh-e-pa magar dil
mahki hui chap sun raha hai

diwaren khadi hui hain lekin
andar se makan gir raha hai

puchhe hai chatak ke ghuncha-e-zakhm
ai ajnabi tera nam kya hai

kis shoala-badan ki yaad aai
daman-e-khayal jal utha hai

socha hai ye main ne pi ke aksar
nashshe mein ye raushni si kya hai

qatil ko duaen do ki 'farigh'
har zakhm-e-wafa ghazal-sara hai