zaban-e-haal pe sabr-o-raza ke lahje mein
nawa-e-gham hai tere be-nawa ke lahje mein

ye pa-e-jabr se rondi hui tamannaen
hain mahw-e-girya-e-paiham dua ke lahje mein

hawa ka shor giran hai samaat-e-gul par
so main hun tujh se mukhatab saba ke lahje mein

waqar-e-ahd-e-mohabbat lihaz-e-shart-e-wafa
shikast-khurda pade hain ana ke lahje mein

ye sher yunhi nahin mo'atabar hue logon
'wafa' ka rang hai ibn-e-wafa ke lahje mein