zahr ko mai dil-e-sad-para ko mina na kaho
daur aisa hai ki pine ko bhi pina na kaho

na batao ki tabassum bhi hai ek zakhm ka nam
chaak hai kis liye insan ka sina na kaho

kam-nigahon ka hai farman ki ai dida-waro
kis liye tum ko mila dida-e-bina na kaho

rakh do ilzam kisi mauja-e-masum ke sar
na-khudaon ne duboya hai safina na kaho

har nafas maut ki bakhshi hui mohlat jaise
koi jina hai ye jina ise jina na kaho

ye to fankar ki mehnat ka sila hai yaro
mere mathe ke pasine ko pasina na kaho

sang-rezon ko kahin thes na lag jae 'shamim'
maslahat hai ki nagine ko nagina na kaho