zinda rahne ka bharam aa ke kahan par tuta
ek sitara sa meri shah-rag-e-jaan par tuta

ghair-mumkin hai meri khak udata koi
main ki khud apni tabahi ke nishan par tuta

sud-dar-sud murawwat meri kaam aai hai
jab main ikhlas ki mizan-e-ziyan par tuta

zahr sa phail chuka hai meri shiryanon mein
kaun sa harf meri nok-e-zaban par tuta

siskiyan bhar ke 'sharar' kaun wahan rota tha
khema-e-khwab sar-e-sham jahan par tuta