zindagi jab se shanasa-e-muhaallat hui
sach to ye hai ki khud apne se mulaqat hui

parda-e-gham jise samjha tha wahi khamoshi
kal teri bazm mein mauzu-e-hakayat hui

hum ko ai qafila-e-shauq ye kya yaad rahe
ki hui subh kahan aur kahan raat hui

teri duz-dida-nigahi ka khayal aate hi
dil mein ek raushni-e-kashf-e-hijabaat hui

is qadar sahl kahan marhala-e-soz-o-gudaz
raat bhar shama ka jalna bhi koi baat hui

pas-e-adab-e-mohabbat ki ba-in raaz o niyaz
muddaton baad-e-saba se na koi baat hui

jis ki mahfil ko 'rawish' jannat-e-farda kahiye
kal usi khusraw-e-khuban se mulaqat hui