zulf jo rukh par tere ai mehr-e-talat khul gai
hum ko apni tira-rozi ki haqiqat khul gai

kya tamasha hai rag-e-laila mein duba neshtar
fasd-e-majnun bais-e-josh-e-mohabbat khul gai

dil ka sauda ek nigah par hai teri thahra hua
narkh tu kya puchhta hai ab to qimat khul gai

aaine ko naz tha kya apne ru-e-saf par
aankh hi par dekhte hi teri surat khul gai

thi asiran-e-qafas ko aarzu parwaz ki
khul gai khidki qafas ki kya ki qismat khul gai

tere aariz par hua aakhir ghubar-e-khat numud
khul gai aaina-ru dil ki kudurat khul gai

be-takalluf aae tum khole hue band-e-qaba
ab girah dil ki hamare fil-haqiqat khul gai

bandhi zahid ne tawakkul par kamar sau bar chust
lekin aakhir bais-e-sussti-e-himmat khul gai

khulte khulte ruk gae wo un ko tu ne ai 'zafar'
sach kaho kis aankh se dekha ki chahat khul gai