duniya ke liye tohfa-e-nayab hai aurat
afsana-e-hasti ka hasin bab hai aurat

dekha tha jo aadam ne wahi khwab hai aurat
be-misl hai aaina-e-adab hai aurat

qaem usi aurat se mohabbat ki faza hai
aurat ki ata asal mein ehsan-e-khuda hai

hai man to dil-o-jaan se lutati hai sada pyar
mamta ke liye phirti hai daulat sar-e-bazar

aasan banati hai dua se rah-e-dushwar
apne gham-o-alam ka karti nahin izhaar

qadmon mein liye rahti hai jannat ka khazana
aurat ke tasawwur mein hai tamir-e-zamana

biwi hai to gham-khwar hai paikar hai wafa ka
aanchal ko bana leti hai fanus haya ka

rukh dekh ke rakhti hai qadam apna hawa ka
girwida banati hai tabassum ki ada ka

khwab-e-nigah-e-ishq ki tabir hai aurat
mardon ke liye husn ki zanjir hai aurat

hai shakl mein beti ki bahaar-e-sahr-o-sham
qudrat ka atiya hai ye qudrat ka hai inam

deti hai masarrat ka dil-e-zar ko paigham
hai ruh ko taskin jigar ka hai ye aaram

dukhtar hai to anmol guhar kahte hain us ko
allah ki rahmat ka samar kahte hain is ko

surat mein bahan ki hai chaman ka ye hasin phul
isar-o-mohabbat hai shab-o-roz ka mamul

be-kar ki ranjish ko kabhi deti nahin tul
ehsas-e-murawwat mein raha karti hai mashghul

likhi hai har ek rang mein aurat ki kahani
kahte hain use azmat-e-insan ki nishani

mariyam hai to pakiza-o-shaffaf hain aamal
ban jae zulekha to haya ko kare pamal

gar hai cleopatra to siyasat ki chale chaal
laila hai to karti hai ye diwana-o-bad-haal

dhal jaana har ek rup mein aasan hai us ko
badle hue haalat ki pahchan hai us ko

'hinda' hai to salari ka dikhlati hai jauhar
hai 'rabia-basri' to ye waliyon ki hai ham-sar

baithi hai agar husn ka bazar saja kar
ghairat ko banati hai asir-e-hawas-e-zar

waqif hai bahar-taur ye jine ke hunar se
be-khauf guzar jati hai har rahguzar se

ek pal mein ye shoala hai to ek pal mein hai shabnam
yani hai kabhi gul to kabhi khar-e-mujassam

ho sabr pe aamada to sah jae har ek gham
ho jae mukhalif to palat de saf-e-alam

paband-e-wafa ho to dil-o-jaan luta de
aa jae baghawat pe to duniya ko hila de