dost kahte hain tere dasht-e-wafa mein kaise
itni khushbu hai mahakta ho gulistan jaise

go badi chiz hai ghamkhawari-e-arbab-e-wafa
kitne be-gana-e-ain-e-wafa hain ye log

zakhm-dar-zakhm mohabbat ke chaman-zar mein bhi
faqat ek ghuncha-e-mantiq ke gada hain ye log

main unhen gulshan-e-ehsas dikhaun kaise
jin ki parwaz-e-basirat par-e-bulbul tak hai

wo na dekhenge kabhi had-e-nazar se aage
aur meri hadd-e-nazar hadd-e-takhayyul tak hai

dil ke bhedon ko bhi mantiq mein jo uljhate hain
yun samajh len ki babulon mein bhi phul aate hain