aur kar lenge wo kya ab hamein ruswa kar ke
ab jo aae hain to jaenge tamasha kar ke

apni takhliq ke ikmal se sauda kar ke
kaun is parde mein baitha hai tamasha kar ke

ek zamana hai pareshan muamma kya hai
tum to ghaeb hue kuchh kaam adhura kar ke

tere jalwe ki hawas hum ko har ek rang mein hai
su-e-but-khana chale jate hain sajda kar ke

taki sajdon ki tadap mein na kami aa pae
aur sajdon ke liye nikle hain sajda kar ke

itni rangin jo duniya hai teri hi to hai
kis tarah kufr karen hum yahan tauba kar ke

jis ne lutte hue dekha hai tamaddun apna
us se kahte ho rahe tum pe bharosa kar ke

hum se kya puchho ho ahwal-e-haram ai logo
aaj ke dard ka jao to mudawa kar ke

'mani' mai-khane ko masjid se chale kahte hue
thodi tabdili ko ho aate hain sajda kar ke