nahin ki ishq nahin hai gul o saman se mujhe
dil-e-fasurda liye jata hai chaman se mujhe

misal-e-shama hai rona bhi aur jalna bhi
yahi to faeda hai teri anjuman se mujhe

badhi hai yas se kuchh aisi wahshat-e-khatir
nikal kar hi rahegi ye ab watan se mujhe

aziz agar nahin rakhta na rakh zalil hi rakh
magar nikal na tu apni anjuman se mujhe

watan samajhne laga hun main dasht-e-ghurbat ko
zamana ho gaya nikle hue watan se mujhe

mere bhi dagh-e-jigar misl-e-lala hain rangin
hai chashmak us gul-e-khubi ke bankpan se mujhe

chhupa na gosha-nashini se raaz-e-dil 'wahshat'
ki jaanta hai zamana mere sukhan se mujhe