aae kuchh abr kuchh sharab aae
is ke baad aae jo azab aae

baam-e-mina se mahtab utre
dast-e-saqi mein aaftab aae

har rag-e-khun mein phir charaghan ho
samne phir wo be-naqab aae

umr ke har waraq pe dil ki nazar
teri mehr-o-wafa ke bab aae

kar raha tha gham-e-jahan ka hisab
aaj tum yaad be-hisab aae

na gai tere gham ki sardari
dil mein yun roz inqalab aae

jal uthe bazm-e-ghair ke dar-o-baam
jab bhi hum khanuman-kharab aae

is tarah apni khamushi gunji
goya har samt se jawab aae

'faiz' thi rah sar-ba-sar manzil
hum jahan pahunche kaamyab aae