aazad ho chuka koi zanjir ho chuka
yani dayar-e-khwab bhi taskhir ho chuka

parina ho chuki hai bahut dastan-e-ishq
ek shahr-e-dasht najd mein tamir ho chuka

barbaad kar chuka hun bahut kuchh ba-nam-e-khwesh
aur jo bacha tha ghair ki jagir ho chuka

kya waqt aa gaya hai meri nasl par ki ab
mera adu bhi sahab-e-tauqir ho chuka

saiqal kiya hai main ne ise apne khun se
kis darja saf ab rukh-e-shamshir ho chuka

kaisi badal ke rah gai hai meri kaenat
wo khush-mizaj phul bhi dil-gir ho chuka

'sajid' nigah daliye ab ird-gard bhi
zikr-e-rumuz rang-e-asatir ho chuka