abru to dikha dijiye shamshir se pahle
taqsir to kuchh ho meri tazir se pahle

malum hua ab meri qismat mein nahin tum
milna tha mujhe katib-e-taqdir se pahle

ai dast-e-junun tod na darwaza-e-zindan
main puchh to lun panw ki zanjir se pahle

achchha hua aakhir meri qismat mein sitam the
tum mil gae mujh ko falak-e-pir se pahle

baithe raho aisi bhi musawwir se haya kya
kahe ko khinche jate ho taswir se pahle

dekho to 'qamar' un ko bula kar shab-e-wada
taqdir pe barham na ho tadbir se pahle