apni nigah-e-shauq ko ruswa karenge hum
har dil ko be-qarar-e-tamana karenge hum

han aap ko uthana padegi nigah-e-lutf
kya muft apne raaz ko ifsha karenge hum

khalwat-kade mein dil ke bitha denge husn ko
aur apne jalwe anjuman-ara karenge hum

ai husn hum ko hijr ki raaton ka khauf kya
tera khayal jagega soya karenge hum

ye dil se kah ke aahon ke jhonke nikal gae
un ko thapak thapak ke sulaya karenge hum