bataun kaise ki sach bolna zaruri hai
talluqat mein ye tajraba zaruri hai
nazar hata bhi to sakti hai kam-nazar duniya
wahin hai bhid jahan takhliya zaruri hai
tere baghair koi aur ishq ho kaise
ki mushrikon ke liye bhi khuda zaruri hai
nahin to shahr ye so jaega sada ke liye
mujhe khabar hai mera bolna zaruri hai
kisi ko hota nahin yun mohabbaton ka yaqin
charagh bujh ke batae hawa zaruri hai
main khud ko bhulta jata hun aur aise mein
tera pukarte rahna bada zaruri hai
wo meri ruh ki aawaz sun raha hoga
badan rahe na rahe rabta zaruri hai