be-khudi mein pahlu-e-iqrar pahle to na tha itna ghafil wo but-e-ayyar pahle to na tha ahl-e-dil jate hain ab dar-o-rasan ki rah se is qadar mushkil visal-e-yar pahle to na tha misr ki galiyan utar aai hain apne shahr mein husn walon ka ye haal-e-zar pahle to na tha aa rahi hai khud-bakhud shayad koi manzil qarib mehrban yun qafila-salar pahle to na tha us mein bhi kuchh raaz hai warna dayar-e-husn mein dard-mandon ka koi gham-khwar pahle to na tha hosh mein aane lage hain un bahaaron ke tufail warna diwanon ka ye kirdar pahle to na tha roz-o-shab apne liye hain qatl ke fatwe 'qatil' mufti-e-shahr is qadar din-dar pahle to na tha