buto ye shisha-e-dil tod do khuda ke liye
jo sang-dil ho to kya chahiye jafa ke liye

sawal yar se kaisa kamal-e-ulfat ka
ki ibtida bhi to hai shart intiha ke liye

khuda se tujh ko sanam mangte to mil jata
magar adab ne ijazat na di dua ke liye

azab-e-atish-e-furqat se kanpta tha dil
hazar shukr jahannam mila saza ke liye

na dil laga ke hua mujh se ishq mein parhez
bigad gaya jo kisi ne kaha dawa ke liye

mila unhen bhi talawwun mujhe bhi yak-rangi
khususiyat na rahi sarsar o saba ke liye

khuda ne kaam diye hain juda juda sab ko
sanam jafa ke liye hain to hum wafa ke liye

jahan-naward rahe hum talash-e-matlab mein
chale na ek qadam ghair-e-muddaa ke liye

mushaira mein padho shauq se ghazal 'bimar'
ki mustaid hain sukhan-sanj marhaba ke liye